الى روح الصديق سمعان الياس الحتي
ـ1ـ
سمعان حتّي الكان قلبو كبير
وورد الصداقه دوم يهديني
قللي إذا رح موت شو بيصير
بسيدني ما عندي عيال تبكيني
عايش وحيد بغربة التعتير
الحيطان وحدا عم تلاقيني
عندي إخت عنّي بعيده كتير
وعندي صهر إسمو على جبيني
وع مجدليا.. دمعتي قناطير
يا ريت فيها رجّع سنيني
وهاك الكنيسه نوّرا تنوير
وقللا: يا عدرا حضري المشلح
ومتل الطفل يسوع غطيني
ـ2ـ
وسافر ع ملبورن هيك بزياره
صرلا زمان تعنّ ع بالو
تاري سنين العمر غدّاره
ما بترحم اللي الحب رسمالو
وسيدني المدينه قالت: خساره
يموت اللي غنّى البسط موّالو
ما عاش وحدو.. عيلتو حاره
وولاد إختو وسّعوا مجالو
ان صاحوا: يا خالي.. بتدمع الجاره
وبتخبّر الإيام شو قالوا
وهالضحكة اللي انقطعت خبارا
سايمن الحتي لفّها بشالو
وبحضن إختو مات.. نيّالو
**
