إلى روح كل راهبة خسرتها الجالية
ـ1ـ
يا جاليتنا.. اليوم شو صابك؟
نخّ الجبل من قوّة مصابك
هالراهبه اللي عمّرت الحجار
إسما انحفر ع عتبة بْوابك
بنت المحبه.. بنت هاك الدار
الخلاّ القداسه تبوّس ترابك
بصفوف حبّا علّمت الزغار
وتخرّجوا من صفوفها شبابك
ـ2ـ
مين البني هالصرح بالهجران
وخلاّ الطفل يعبد اسم لبنان
هديتا العمر.. صار العمر فرحان
وقلبي بينبض نبضة الرهبان
كيف ما حكت.. تزرع صلا وايمان
كيف ما مشت.. يمشي معا البنيان
تآخيت معها من قديم زمان
ومحروم صوت الاخت يا اخوان
ولهالسبب وحدي أنا الخسران
**
