إلى روح الوالد الشاب سيمون بدر يونس
ـ1ـ
أمّك قالتلي: كتير زعلانه
ما ودّعت سيمون.. شو بقلّك؟
وخيي اللي متلك مات بكّاني
فكّرت خيي مات من تاني
وعارف إنت أهلي متل أهلك
ـ2ـ
أمك على التابوت مصلوبه
ودمعة ولادك دم مسكوبه
ومرتك إذا بتجنّ ما بتنلام
قالت: سيمون شوي حبّ ينام
هوّي الحبيب الـ زيّن دروبي
ـ3ـ
وبيّك بدر عتّم بـ هالغربه
تا تموت قبلو.. المسأله صعبه
لما الأهل بيودّعوا الأولاد
رح يغرقوا بسواد خلف سواد
وبيصرخوا: ما عدلت يا ربي
ـ4ـ
ويا مجدليا ودّعي هـ الشبّ
سيمون شيخ شباب وبينحبّ
خلّي الكنيسه تصمُد القربان
وخلي الأرز يبكي بجبل لبنان
هـ الشب يا ما حبّ أرز الرب
**
