توفاه الله بعد ساعتين فقط من يوم عيد ميلاده السبعين
ـ1ـ
مش حق انو تموت يا خيي
وتصير شمعة عيد مطفيه
سبعين سنه مرقت كأنا خيال
وتشفى يا خيي.. تكون عيديه
الظاهر اشتقت تكون مع مرسال
وتبُوس امي وتحضنو لبيي
شو نسيت عندك هون احلى عيال
بناتك يا خيي شموس مضويه
"تايرا".. "بريسيلا".. جنى وغلال
مع "مالني" البتدوب حنيّه
و"أودري" و"أيْفا" الصدق ينقال
بيبكوا ع جدّن قهر ليليه
ومرتك تراز محبتا رسمال
رجوعك ع بيتك أجمل هديه
بقلبا اسم.. كان الاسم ميشال
صفّى ع تمّا لحن غنيّه
بتندب لَحالا، دمعتا شلال
طول الليالي حاضنه شبيه
بموتك أنا.. حامل ع كتفي جبال
ختيرت.. والنهدات صاروا تقال
لازم يا خيي تشفق عليي
ـ2ـ
بواب السما رح تفتح لعينيك
قديس انت.. محبتك قنطار
الاخوه اللي بقيوا عم بيبكوا عليك
الرابع انا.. وماشي متل ختيار
وهالمسبحه اللي حملتها بايديك
صارت يا خيي للقداسه مزار
ولما يا "ميشو" القلب يشتاق ليك
بهالمسبحه بصلي لألله كتير
تا بحضن سيدة مجدليا تصير
يا ريت فيني آخدا تذكار
ـ3ـ
كيف بدي ودعك قللي
واغرق بدمعي واخسر الطله
وعارف إذا بتموت.. شربل مات
مش حق ترميني ب هالعله
كنت بالعيله ابو الهمات
سعر الاخوه قادر تغلي
بصوتك انا عم قدس الكلمات
باليوم تحكيني خمس مرات
ورح ضل اسمع صوتك وصلي
ـ4ـ
بيوم عيدك.. ليش حتى تموت
سبعين سنه منزيّنا بياقوت
خسرناك يا "ميشو" يا أعظم خي
وتهدّمت بعد الفرح البيوت
بعيون كل الناس باقي حي
مش بالقبر.. بالقلب رح بتفوت
المتلك ما لازم ينتهي بتابوت
**
