الى روح أخي ورفيق عمري جوزاف سركيس بعيني 24 تموز 2025
ـ1ـ
اليوم، والله، تكسروا جناحي
وجوات قلبي هبّت رياحي
وجرّبت إبكي، وكيف رح إبكي
ومن الوجع سكران مش صاحي
جوزاف إنت بترسم الضحكه
ع شفاف غرقانه بأتراحي
رفيق العمر.. بسمع إذا بتحكي
سكوتك يا خيي كسّر قداحي
وفرنوك.. يئسانه وعم بتشكي
وتقول ماتت كل أفراحي
عيله حنونه، وجودها بركه
خيّم عليها الحزن يا بو "دوم"
موتك يا خيي فتّق جراحي
ـ2ـ
يا حسرتي الإنسان كيف بيروح
متل شي نسمة هوا شمالي
وشو بتنفع الأحلام لما الروح
تفارق جسم من خلقتو بالي
ومجدليا الربتك ع سطوح
منها تطال الشمس بالعالي
ما نسيتك.. بس القلب مجروح
موتك قتلها كتير يا غالي
يا الكنت قنينة عطر بتفوح
تعطّر الغربه بعتمة ليالي
وقاعد أنا بـ غربتي عم نوح
وإرسم خيالك ع الورق قصدان
من هيك صعبه تروح من بالي
ـ3ـ
سبقوك أهلي وإخوتي واليوم
رحتوا اجتمعتو بالسما سويه
وبعدي أنا حاطط ع نفسي اللوم
ليش بعدي هون يا خيي
كتار صرتو.. رح تعيشوا دوم
هونيك بالجنه السماويه
وبكَوْن خاطي بدون توبه وصوم
باقي أنا مشلوح وحدي هون
من فوق خلّي عينك عليي
ـ4ـ
إبنين مع بنتين بكيوا عليك
عاشوا المحبه كلّها بقربك
وصهر مع كنتين بعينيك
سكنوا يا خيّي وزيّنوا دربك
ولادن إنت ربيت، وبإيديك
غمرتن، بعد ما غمرتن بقلبك
شوف الأحبه كلّن حواليك
بقلك بإسمي.. بإسم كل الناس
جوزاف.. يا جوزاف منحبك
