إلى روح الام جميلة حنا أبي خطار بتاريخ 19/1/2026
ـ1ـ
جيتي ع غربة والعذاب حمال
تعبتي تا تبني بيت لبناني
يا جميله الأم.. شو ما انقال
سيدني عليكي كتير حزنانه
دمعاتها نزلت متل شلال
دلقت شتي بكانونها التاني
وبمجدليا تجمعوا العيال
ورشوا البكي ع صخور عطشانه
شلحت العدرا بكنيستنا شال
عرفوا العدرا كتير بكيانه
يا جميله العايشه بالبال
بقلك: يا إختي بيفرح لساني
خسرت الأحبّه.. والحزن قتّال
ولِكْ كيف رح بتخف أحزاني
ـ2ـ
كوكب، يا كوكب وسعي الأحضان
جايي جميله لحضنك الدافي
فيّقي حنا إذا غفيان
وقولي لموريس يزيّن حفافي
بواب السما انفتحت إلا من زمان
تا إندبا بالشعر مش كافي
يا جميله.. الضحكتك بترن
ليش القسا.. وأعمارنا كذبه
آميل خيي اليوم رح بيجن
موتك حرق قلبو بهالغربه
قاعد لوحدو مدمّع وبيعن
انغرزت بصدرو من الزعل حربه
ـ3ـ
وبناتك اللي بالصلا ربيوا
صاروا بسيدني زهر البساتين
وخيّات، شو خيّات.. لِمْ بكيوا
خدودن من الدمعات دبلانين
وأنطوان خيّك ما انسمع حكيو
زعلان.. حدّو عيال زعلانين
متل ما عطيتي الفرح عطيوا
عاشوا بشر بتياب قديسين
ما بقول متّي.. الأم ما بتموت
ع قلوبنا.. مش ع القبر بتفوت
الأم الحنونه ما لها نهايه
موتك ع درب التضحيه بدايه
ما في أمومه بتنتهي بتابوت
**
