الى روح الوالد الحنون اميل مرعب
أعظم صديق الكل صاروا يعرفوك
آخد رضا مْلاكين: إمك مع أبوك
آميل مرعب يا رفيقي بغربتي
كل البشر، متلي أنا، بيقدروك
حصرون بكيت دم، تكيت أرزتي
حصرون والأرزه صعب تا يودعوك
قلتلهن: بكرا بحقق رجعتي
وبعدن ع مفرق ضيعتك عم ينطروك
وأميليا، ست الطهر، من ضيعتي
حبيتها، وعشتوا سوا متل الملوك
قلتلها: من الرب إنتي هديتي
هدْيِتك أعظم نسل تا يخلدوك
وبنيّتك (لورين) عطيت عيلتي
كل الفرح، لا يكون في عندك شكوك
بتنده: يا عمي.. برد: يا تلميذتي
كلك حنان وعاطفه وحسن السلوك
حبّت إبن خيّي أنا.. يا فرحتي
عطيوا الدني أطفال حتى يفرحوك
وشبّين، رح علّق ع صدرن خرزتي
زيّنتهن بالحب حتى يزيّنوك
ربيتهن بالطهر.. إخدوا محبتي
ع صيتهن كل البشر بيكرموك
وأحفاد، يا آميل، خلّوا دمعتي
تكرج.. وقت ما سمعتهن عم يندبوك
معليش لو علّيت نتفه صرختي
قديس انت.. وهيك بنهي كلمتي
مش بالقبر.. بقلوبنا رح يقبروك
