الى روح الوالد الحنون فهيم سليم لولش
فهيم لولش مات يا حدشيت
دقّي جراس الحزن كرمالو
صهر المحبه بالدموع رثيت
فرّح بسيدني أرزة جبالو
والد بحنّيتو بعد ما لقِيتْ
تفيّت العيله بفيّة خيالو
يا ماريان اليوم راسي حنيت
مات اللي كان الحب رسمالو
قلك: معك يا روح روحي عليت
كنتي لعمري كل آمالو
ويا جاسينتا ع الجبين قريت
البنت الوحيده زهرة عيالو
كان حلمو يسمع زلاغيط
بعرس العروس الريحت بالو
قلك: يا بنتي لا تقولي قسيت
إنتي بقلبي نور مشعالو
وإمّو وبيّو محبّتُن ما نسيت
زتّ الحزن بالصدر أحمالو
حبّيت إبنن حد منّو مشيت
تربّى بقداسه وحب نيّالو
ع الصهر، والله، يا سليم بكيت
تا صار دمعي دم شلالو
ويا أم فهيم اليوم شو ما حكيت
إبنك صعب تا نرد أفضالو
فهيم.. ما بتلبق إلو توابيت
الهجران غنّى لحن موّالو
إبن لولش كان عندو صيت
بالخير توّج كل أعمالو
يا صهرنا.. تا إندبك ما جيت
جايي تا قول لكل هالأحباب
فهيم جوّا القلب تمثالو
