الى روح اخي الحبيب انطوان سركيس بعيني
ـ1ـ
منعوا الأطبا تا نقرّب ليك
ولِكْ غصب عنّن بوّست إجريك
ولمّن قالولي متّ والله دختْ
كيف الجبل بيموت فوق التختْ؟
وكيف الشمس رح تنطفي بعينيك؟
ـ2ـ
وما ضل عندي دموع يا خيي
نِشْف الدّمع جوّات عينيي
موتك يا بو سركيس خلاني
إكره عمر عم يضحك عليي
مرسال غاب وغاب من تاني
ميشال حتى يرافقوا بيي
وأمي اللي عطفا كتير رَبّاني
عيالا التقوا بجنه سماويه
بقينا تلاته.. وكل شي فاني
جورج وجوزاف وشربل خْطيّه
تعبان، يا ربي، لا تنساني
عم جر حالي.. الحزن أضناني
تا عيش باقي العمر ما فيي
ـ3ـ
تراز عم تبكي دموعا دم
وعم تحضن العيله بحنان الأم
وسركيس خسر البي يا دلّو
الإبن الوحيد الزهرتو بتشم
أنطوان يا أنطوان شو بقلّو
صعبه حنان البي يعطي العم
وبّات حملت إسم منجلو
هاي بترونله الحولها منلتم
وجرح كارول آخ ع حلّو
كان اشتكى لو كان عندو تم
كوّنت عيله بيرقا علّوا
ولِكْ قوم شوفا غارقه بالهم
من بعد ما وهبتا العمر كلو
وصاروا البشر ع نسلك يدلوا
موتك سقاها من كواعا السم
ـ4ـ
يا كبيرنا.. صار الهجر ممقوت
ومجدليا زعلت وبيروت
حملت الوطن بـ قلبك دخيره
زيّنتها بالمجد والياقوت
رح جن يا خيي من الحيره
كيف العا كفّو بتنبنى البيوت
وحلفت بإسمو الناس والجيره
بلحظه زغيره بينتهي بتابوت
يا ملايكة السما طيري
وخبّري خيي الـ غرق بسكوت
البيعيش جوّا القلب ما بيموت
**
